გერმანიის კანცლერი ევროკავშირში გაწევრიანების გამარტივებას ითხოვს

გერმანიის კანცლერი ევროკავშირში გაწევრიანების გამარტივებას ითხოვს. პლაფ შოლცის თქმით, ეკონომიკური ბლოკის გაფართოებისთვის უნდა მოემზადონ არამარტო გაწევრიანების კანდიდატები, არამედ თავად ევროკავშირიც.

„ამისთვის ევროკავშირმა უნდა მოახდინოს თავისი სტრუქტურების და გადაწყვეტილების მიღების პროცესების მოდერნიზება. ყოველთვის არ იქნება შესაძლებელი ყველაფრის ერთხმად გადაწყვეტა, თუნდაც დღეს ეს პროცედურა ერთსულოვნებას მოითხოვს“, – განაცხადა კანცლერმა.

კანცლერის თქმით, აღნიშნულის შესახებ 23-24 ივნისს დაგეგმილ ევროკავშირის სამიტზე სურს საუბარი. ის ასევე იმედოვნებს, რომ სამიტი სტიმულს მისცემს დასავლეთ ბალკანეთის ქვეყნებს, რომლებიც თითქმის ორი ათეული წელია ელოდებიან ევროკავშირში გაწევრიანებას.

„ჩვენ უნდა ვაჩვენოთ დასავლეთ ბალკანეთის ქვეყნებს, რომ სერიოზულად ვართ განწყობილნი. ალბანეთი და ჩრდილოეთ მაკედონია ყველა მოთხოვნას პასუხობენ, რომ დაიწყონ ევროკავშირში გაწევრიანების კონკრეტული მოლაპარაკებები – ისინი ახლავე უნდა დაიწყოს”, – თქვა შოლცმა.

მომავალ კვირას დაგეგმილ ევროკავშირის სამიტზე, 27 წევრი ქვეყნის სახელმწიფოებისა და მთავრობის მეთაურები განიხილავენ უკრაინის, მოლდოვასა და საქართველოს განაცხადებს. ევროკომისიამ რეკომენდაცია გაუწია უკრაინის და მოლდოვას ოფიციალურ კანდიდატ ქვეყნებად გამოცხადებას. საქართველოს კი ევროპული პერსპექტივა მიენიჭა. 

Related posts

კომენტარის დამატება